عاداد طبيعي

لݣروپ د لأعداد الطبيعيين عندو الرمز ديال $\mathbb{N}$.

فلماط، لعاداد طّبيعي هوما عاداد لي كايتستعمل فلحساب (بحال ف "كاينين خمسة دلبݣرات حدا لواد") والترتيب (بحال ف "هشام الݣروج جا اللول فالسيباق"). لأعداد اللي كايتستعملو فلحساب كايتسماو لأعداد لأصلية، و لأعداد لي كايتخدمو فالترتيب كايتسماو لأعداد الترتيبية. لأعداد الطبيعيين كايتخدمو بعض لمرات بحال سميات ديال شي حوايج، بحال ف أوطوروت 3 أولّا الطريق لوطنية 1، أولّا النمرة ديال لكيطمة ديال شي كوايري. هاد النوع كايتسمى لأعداد السمياتية وماعندو حتى شي خاصية فلمفهوم ديال لماط.

ف سّيستيم لعشري، لأعداد ف لعادة كيتكتبو ب نماري، لي هوما رموز كيعبّرو على لأعداد من 0 ل 9. كاينين بزاف د سّيستيمات لمومكينة د لكتابة د لأعداد، بحال سّيستيم جّوجي لي كيخدّم غير 0 ؤ 1، ؤلا سّيستيم سّطاشي لي كيزيد 6 د رّموز إضافيين ل سّيستيم لعشري باش يعبر على جميع لأعداد. كاينين سيستيمات قدام بحال سّيستيم رّوماني د لأعداد، لي كيخدّم حروف بحال I ؤلا X ؤلا L، باش يرمز ل لأعداد 1، 10، 50 على تّوالي، ؤ مافيهش رمز ديال زيرو. هاد سّيستيم كيعتامد على لموضع ديال رّمز (على ليمن ؤلا ليسر ديال شي رمز كبر منو) باش يرشم لأعداد كاملين، ؤ كان سيستيم محدود (مايقدرش يعبر على أعداد كبار بزاف)، ؤ معقد ف لحساب.

بعض التعريفات كاتبدا لأعداد الطبيعيين من زيرو $\mathbb{N}=\{0,1,2,\dots \}$، وكايتسماو لأعداد لي ماشي سالبين. و تعريفات خرين كاتبدا من واحد $\mathbb{N}=\{1,2,3,\dots \}$ وكاتسميهوم لأعداد لموجبين. لخاصيات ديال لأعداد الطبيعيين، بحال لمقسومية و التفريقة ب لأعداد اللولانية كتدرسها النضرية د لأعداد. لمسايل بحال لحساب و الترتيب بحال التفراق كايفكها التعداد. الرمز ديال لݣروپ د لأعداد الطبيعيين هو $\mathbb{N}$.